ශ්‍රී ලංකාව තුළ බුදුදහම ව්‍යාප්ත වීමට ප්‍රථම ජනතාව විවිධ ඇදහිලි සහ විශ්වාසයන් අනුගමනය කරන ලදී. මිහිදු මහ රහතන් වහන්සේ ප්‍රධාන ධර්ම දුත කණ්ඩායම මෙරටට ගෙන ආ බුදුදහමේ පණිවුඩය ප්‍රථමයෙන් රටේ ප්‍රධාන පුරවැසියා වූ රජු විසින් පිළිගනු ලැබිය . රටේ සම්භාවනාවට පත්‍ර වූ බුදුදහම රට වැසියා අතරෙහිද ශීඝ්‍රයෙන් පැතිර ගියේය . මේ නිසා මෙරට ජනතාවට බුදුදහමින් නව ජිවන ආලෝකයක් උදාවිය . මිත්‍යා ඇදහිලි ශක්තියෙන් ජිවත් වන්නට පුරුදු වී සිටි ජනතාව එම ඇදහීම් වෙනුවට මළවුන් සිහිකොට පින් දීමට පුරුදු වුහ.දෙවියන්ගේ උදහසට ලක් වේයැයි යන බියෙන් වෘක්ෂ හා පර්වත වන්දනා කළ ජනතාව ඒ වෙනුවට බෝධි පුජා , වෙහෙර වන්දනා වැනි ශ්‍රද්ධාවෙන් කරනු ලබන පුජා විධි අනුගමනය කිරීමටත් දෙවියන්ට පින් අනුමෝදන් කිරීමටත් පුරුදු වුහ. ජනතාව පොදුවේ පිළිගත් දහමක් නොතිබුන අවධියක බුදුදහම රජයේ ආගම මෙන්ම ජාතික ආගම බවටද පත් විය .
